Товч агуулга:Энэхүү ном нь Монгол Улсад хүчин төгөлдөр мөрдөж буй 85 нэр томьёоны стандартын 10387 нэр томьёог хэлний хэм хэмжээ, стандарт шаардлагад нийцэж буй эсэхийг судлан шинжилж бичсэн бүтээл болно. Уг бүтээл нь Нэгдүгээр бүлэг: Нэр томьёо ба стандартчилал, Хоёрдугаар бүлэг: Стандартчилсан нэр томьёоны бүтэц, бүрэлдэхүүн, Гуравдугаар бүлэг: Стандартчилсан нэр томьёоны үгийн сан, утга зүй гэсэн үндсэн гурван бүлэгтэй. Нэгдүгээр бүлэг нь нэр томьёоны стандартчилал, стандартын ерөнхий ойлголт хийгээд нэр томьёоны стандарт шаардлагыг тодорхойлж, стандартчилсан нэр томьёог уг шаардлагад нийцэж буй эсэхийг оноолт, тодорхойлолт, нэр томьёо ба ухагдахууны харьцаа талаас задлан шинжилж, алдаа дутагдлыг илрүүлэн хэрхэн засаж сайжруулах талаар өөрсдийн саналыг дэвшүүлсэн.
Хоёрдугаар бүлэг нь стандартчилсан нэр томьёог дан ба нийлэмж хэмээн ерөнхий ангилан тоон үзүүлэлтээр гаргаж, тус тусын онцлогийг тодорхойлж, бүдүүвч, загвар, жишээ баримтаар тодруулан өгүүлжээ. Гуравдугаар бүлэг нь стандартчилсан нэр томьёог үгийн сангийн үүсвэр бүрэлдэхүүний үүднээс зүйлчлэн ангилж, тус бүрийн онцлогийг тодорхойлохын зэрэгцээ зарим эргэлзээтэй асуудлыг тодруулан, жишээ баримтаар тайлбарласан байна.
