Товч агуулга:Энэхүү товхимол нь МУИС-ийн ГХСС-ийн Нэр судлалын төвийн судалгааны хүрээнд “Дэлхийд тархсан монгол газар нутгийн нэр” (УБ.,2005,2006,2013) цуврал товхимлыг анх цөөн ширхэг хэвлэсэн гурван дэвтрээсээ шигшин авсан болон шинээр заримыг нь нэмсэн, цөөнгүй улс орны эрдэмтдээс монгол, англи, орос, франц, хятад хэлээр бүтээсэн өгүүллүүдийн цомог юм. Өгүүллүүдийн агуулга нь Монгол их гүрнийхээ хувь зохиолыг даган наад зах нь НТ-ын 300-гаад оны үеэс дэлхийн олон улс оронд цацагдан тэнд идээшсэн монгол газар нутгийн нэр (МГНН)-ийг “Танай юм шүү “ гэж тогтоож өгсөн харь улсын эрдэмтдийн судалгааны нээлтүүд болой. МГНН нь тийнхүү үзэхээр эргэлзээ бүхий эд өлгийн зүйлээс хэдэнтээ илүү Монголын түүх- соёлын маргашгүй, мартагдашгүй өв сурвалж, баримт мөнөөс мөн. Нэр дагаж бидний өвөг дээдсийн түүхэн тодорхой үйл, зан заншил, ёс суртахуун зэрэг нь Өрнө, Дорнын олон улсад хэрхэн, хаана, яаж өрнөснийг аль нэг байдлаар энэхүү товхимолд тусгагдсан гадаадын судлаачдын эрдэм шинжилгээний өгүүлэл бэлхнээ харуулж байна.
