Товч агуулга:Д.Тангад нь 1976–2003 онд Шинжлэх ухааны академийн Түүхийн хүрээлэнд ажиллахын зэрэгцээ 1990–2009 онд бие даан угсаатны зүйн судалгаагаа өргөжүүлэн явуулж, 2010 оноос Соёл урлагийн их сургуулийн Соёл иргэншлийн сургуульд Монголын угсаатны зүйн багшаар ажиллахын сацуу Польш Улсын Варшавын их сургуулийн Угсаатны зүйн тэнхимийн эрдэмтэн, багш нартай хамтран хээрийн судалгааг тасралтгүй гүйцэтгэж буй, манай ахмад үеийн цөөн тооны тэргүүлэх судлаачдын нэг болно. Тэрээр монголчуудын угсаатны зүйн судалгааны хэд хэдэн багц сэдэв асуудлыг олон жил хичээнгүйлэн судалж туурвисан бүтээлээ нэхэн нягталж, уншигч түмэндээ толилуулж байна. Эл бүтээлээс та Монголын олон ястны дотроос Халх, Хамниган, өрнөд монголын дөрвөд, торгууд болон бусад ястны амь зуулга, аж төрөхүйн уламжлал, хувьсал, эдүгээгийн байдлыг тэдний ан гөрөө, ав хомрого, мэдлэг ухаан, итгэл бишрэл, арга дом, ажил үйлд суурилан судлаж хэн хүнийг ухаж ойлгоход дөт гаргалгаа, дүгнэлт хийснийг үзэж болно.
