Товч агуулга:Шинжлэх Ухааны Академийн Түүх, угсаатны зүйн хүрээлэн болон Үндэсний Төв Номын сан хамтран монголчуудын овог, угсаа язгуураа үнэн зөвөөр танин мэдэхэд чухал ач холбогдолтой ажлыг 2023 онд эхлүүлжээ. Тодруулбал тус хоёр байгууллага гэрийн үеийн бичмэлийг цуврал болгон гаргахаар зорьж, эхний ботио уншигч түмэндээ хүргэж байна. Монгол тольд тайлбарласнаар "Гэрийн үеийн бичмэл гэдэг нь өөрсдийн овог, угсаа язгуур, үе залгамжаа үр хойчистоо мэдүүлэхийн тулд бичгээр хөтлөн уламжилсныг хэлнэ" гэжээ. Угийн бичиг нь овог нийтийн түүхийн тэмдэглэл байсан бол гэрийн үеийн бичмэл буюу гэрийн түүх нь нэгэн өрхөөс гаралтай хэсэг хүний тэмдэглэл байсан аж.
Үндэсний Төв Номын Санд 170 орчим гэрийн үеийн бичмэл байдаг бөгөөд эхний боть болох “Халхын Түшээт хан аймгийн төрлийн тайж нар” номд 49 нь багтсан байна.
