Товч агуулга:Аюулгүй байдал судлалын хүрээлэн Монгол Улсын гадаад орчинд 2023 онд өрнөсөн гол өөрчлөлтийг авч үзэхдээ их гүрнүүд, бүс нутгийн орнууд, жижиг улсууд гэсэн гурван түвшинд харж, жилийн турш ажигласан байна. Их гүрнүүдийн түвшинд нэг талд АНУ тэргүүтэй өрнөдийн орнууд, нөгөө талд ОХУ, БНХАУ тэргүүтэй бусад орон гэх талцал хуваагдал улам гүнзгийрсэн таагүй жил болсон бол бүс нутгийн түвшинд "томчуудын" энэ хуваагдлын явцад Энэтхэг, Турк зэрэг бүс нутгийн гол тоглогч орнууд идэвхжин тодорсон жил байлаа. Хамгийн эмзэг нь жижиг орнууд байх бөгөөд олон улсын харилцаанд "хар хун" болон дэвсэн ОХУ Украины дайнаас хойших "чичиргээ" тэдэнд амаргүй тусаж, их гүрнүүдийн нөлөөгөө тэлэх гэсэн өрсөлдөөнд жижиг орнууд "хөл алдах" эрсдэл нэмэгдэж буйг 2023 оны үйл явдлууд илтгэн харуулав.
