Товч агуулга:Зохиогч энэхүү бүтээлээр XIV-XIX зууны Монгол-Солонгосын холбогдсон түүхт байдлыг улируулан судалж, нэгтгэн дүгнэх, улмаар хоер орны харилцааны дүр төрхийг бүс нутгийн олон улсын харилцааны уялдаа холбоонд гаргах, өгүүлэн буй үед монгол, солонгосчууд бие биеийнхээ талаар ямар байр суурь хийгээд ойлголт, төсөөлөлтэй байсныг тодруулахыг зорьсон байна. Мөн тус бүтээлд Солонгосын Чосөнъ улсын албан түүхийн хамгийн гол 3 сурвалжаас XV-XIX зууны Монгол-Солонгосын харилцаа болон Монголтой холбоотой 700 гаруй мэдээ баримтыг илрүүлэн судалж, шинээр судалгааны эргэлтэд оруулжээ. Эдгээр нь зөвхөн XIV- XIX зууны хоёр улсын харилцааны түүхийг судлахад чухал эх хэрэглэгдэхүүн болоод зогсохгүй, өгүүлэн буй үеийн Монголын түүхийг судлахдаа, хятад, манж, орос зэрэг харь хэлний сурвалжид голчлон тулгуурладаг байсныг шинэ баримтаар нөхвөрлөх, Солонгос гэсэн гуравдагч орны сурвалжийн мэдээтэй харьцуулан нягтлах боломжийг олгож байгаагаараа чухал ач холбогдолтой юм.
