Товч агуулга:2023 онд ШУА-ийн Түүх, угсаатны зүйн хүрээлэнгээс Булган аймгийн Дашинчилэн, Баяннуур сумдад “Түшээт хан аймгийн Жонон засгийн хошуу: түүх, соёлын асуудал" сэдэвт эрдэм шинжилгээний хурлыг зохион байгуулсан байна. Тус хуралд ШУА-ийн Түүх, угсаатны зүйн хүрээлэн, Археологийн хүрээлэн, МУИС, МУБИС, Төмөр замын дээд сургууль, Богд хааны ордон музей, Булган аймгийн түүхчдийн холбоо зэрэг байгууллагын эрдэмтэн судлаачид болон бусад хувь судлаачид оролцож нийт 14 илтгэлийг хэлэлцүүлжээ. Илтгэлүүдэд тус хошууны түүхэнд хамаарах түүх, соёлын дурсгалууд, түүхэн хүмүүс, Булган аймгийн Бүрэгхангай, Дашинчилэн сумын нутагт явуулсан угсаатны зүйн судалгааны тойм, Баяннуур суманд 2016 онд явуулсан угсаатны зүйн хээрийн шинжилгээний үр дүн зэрэг Жонон засгийн хошууны түүх соёлын асуудалд хандсан олон илтгэл хэлэлцэгдсэн агаад эдүгээ хурлын эмхэтгэлийг хэвлэж уншигч та бүхэнд өргөн барьж байна.
