Товч агуулга:Шинжлэх ухааны гавьяат зүтгэлтэн, академич, хэл шинжлэлийн шинжлэх ухааны доктор, профессор Домийн Төмөртогоогийн эрдэм шинжилгээний бүтээлийн чуулган 10 ботийг уншигч Танаа өргөн барьж байна. Монгол хэлний хөгжлийн түүх гэсэн агуулгад багтаж байгаа "Алтайн хэл ба монгол хэл" хэмээх эхний үгүүлэлд монгол хэл ба түрэг, манж-түнгүүс хэлнүүдийн харьцангуй адил төстэй тал нь тэдгээрийн гарал үүсэлтэй холбоотой юу гэдэг асуудлыг хөндсөн бол "Монгол хэлний гарал үүсэл, түүхэн үе шат" үгүүлэлд монгол хэлний хувьсан хөгжиж ирсэн үе шатууд, тэдгээрийн онцлог шинжүүд бичгийн дурсгалд хэрхэн туссан тухай үгүүлсэн байна. Тэдгээрийн дараа орсон "Монголчуудын үсэг бичгийн түүхэн тойм", "Монгол бичгийн хэл, түүний үе шат" зэрэг үгүүлэлд монголчуудын хэрэглэж ирсэн үсэг бичгийн түүхэн тойм хийгээд монгол бичгийн хэл үүсэн бүрэлдэж хэвшин тогтсон тухай асуудлыг тусгасан бол "Орчин үеийн монгол хэл аялгуунууд" гэсэн үгүүлэлдээ эдгээрийн монгол хэл аялгуунуудын онцлог болон нийтлэг шинж, тэдгээрийн судлагааны тойм зэргийг багтаасан болно.
