Товч агуулга:Хэнри Киссинжэр олон арван жилийн турш нэн анхааралтай ажиглан судалж, барууны ертөнцтэй орчин цагийн харилцаа тогтооход нь тус дэм үзүүлж ирсэн нэгэн улс орныхоо гадаад харилцааны түүхийг энэхүү номондоо дэлгэрэнгүй өгүүлжээ. Тэрээр хятадын гадаад бодлогыг түүний эртний түүхэн үеэс эдүгээ хүртэлх гол хэрэг явдалтай нь уялдуулан авч үзсэн байна. Чингэхдээ хятадын дипломат үйл ажиллагааны дотоод ертөнцийнх нь дүр төрхийг түүхийн ээдрээт цаг үеийн олон үйл явдалтай холбож харуулжээ. Түүндээ хятад болон баруун европын орчин цагийн гүрнүүдийн анхны харилцаа, Хятад-Зөвлөлтийн холбоотны үүсэл ба задрал, Солонгосын дайн, Хятадад хийсэн Никсоны айлчлал болон Тайванийн хоолойн гурван хямралыг хамруулсан байна. Хятадын дөрвөн үеийн дээд удирдлагатай уулзаж учирч явсан дотносог харилцааныхаа дурсамжийг үндэслэж Мао, Жоу Эньлай болон Дэн Сяопин зэрэг түүхэн хүмүүсийг томруун гаргаж, тэдний өөр хоорондоо зөрөлдөөнтэй үзэл бодол нь хятадын орчин цагийн хувь тавиланд хэрхэн нөлөөлснийг тусгажээ.