Товч агуулга:Монгол түмний байгалиа дээдлэн хямгадаж, амьдрах аргын суурь болгон эвсэн орших зан заншлын дэг жаяг, хууль цаазын зохицуулалт, энэ талын уламжлал, шинэчлэлийн залгамж холбоог онолын томьёоллоор баталгаажуулж амьдралд хэрэгжүүлэх арга замын зүг чигийг гаргасан Осорын Амархүү агсны судалгааны бүтээлүүд нь өнөө хүртэл байгаль орчны салбарт ажиллагсад төдийгүй, эх орныхоо онгон дагшин байгалийн сүр хүч, өмөг ивээлд сүсэглэн биширч явдаг өргөн олны ширээний ном хэвээр байна. Уг гарын авлага нь байгалиа хайрлан хамгаалах Монгол арга ухаан, соёлыг эрдэмтэн судлаачийн билиг оюунаар Монголын буурал түүхийн бүх үед биелж ирсэн өвөрмөцийг нь тодруулан тунгаасан бүтээл юм. Учир иймд зүсэн зүйлийн гамшиг нүүрлэсэн өнөөгийн "цөвүүн" цагт байгаль эхээ хамгаалах монгол төрийн хууль цааз, ард түмний зан заншлыг охилон дээжилсэн энэхүү шаштир төрийн бодлогын нэгэн чухал эх сурвалж болох төдийгүй үр удам, хойч үеэ уул усандаа ээлтэй, элэгтэй жинхэнэ эх орончид болгон хүмүүжүүлэхэд нэн ач тустай бүтээл болжээ.
