Товч агуулга:Монгол хэлний үгийн бүтцийн талаар олон орны эрдэмтэд зуугаад жилийн турш судласаар ирсэн боловч эдүгээ хүртэл бүрэн шийдэгдээгүй асуудал байсаар байна. Ялангуяа язгуур морфемын бүтцийн тухай зарим асуудал бүрхэг бүдэг байгаа билээ. ШУА-Хэл зохиолын хүрээлэнгээс эрдэмтэн судлаачид монгол хэлний үгийн бүтцийн судалгааг цаашид ахиулахад илүү гүнзгийрүүлсэн судалгаа шаардлагатай гэж үзээд, үүний тулд юуны өмнө "Монгол хэлний үгийн бүтцийн толь" эмхэтгэн гаргах нь зүйтэй хэмээн үзэж тус хүрээлэнгийн хэл шинжлэлийн секторын хамт олон уг ажлыг 2011-2013 онд хэрэгжүүлэх эрдэм шинжилгээний төсөлт ажлын нэгэн сэдэв болгон батлуулж, улмаар уг толь бичгийн аргазүйг боловсруулсан байна. Энэхүү толь бичиг нь монгол хэлний нэгэн язгуураас салбарлан гарсан үгсийн эгнээ үүсгэх замаар тэдгээрийн дотоод бүтцийг язгуур, дагавараар нь ялган тогтоох гэсэн анхны оролдлого болно.
