Товч агуулга:Энэхүү цуврал зурагт цомог нь Баян-Өлгий аймгийн Улаанхус сумын нутагт орших Бага Ойгор, Цагаан салаа голын сав газрын 15 километр орчим талбайд тархсан олон мянган хадны зургийн зохиомжоос сорчлон авч олон нийтэд зориулсон бүтээл болно. Ихэнх зураг дүрслэлийг цохиж цоолборлох аргаар сийлж үлдээсэн хадны зурагт эртний хүмүүсийн амьдрал ахуйг дүрслэхээс гадна буга, янгир, аргаль, чоно, ирвэс, баавгай, бодон гахай, үхэр, адуу, тэмээ зэрэг олон амьтдыг дүрсэлж, морь, үхэр, тэмээ унасан хүн, морин тэрэг, ан гөрөө хийж багаа анчид, байлдаж буй дайчин эрс зэрэг олон сэдвийг зохиомжлон зурсан нь сонирхол татахуйц урлагийн бүтээл юм. Энэхүү баялаг түүхэн дурсгалыг монгол, англи хэл дээр хэвлэжээ.