Товч агуулга:Францын хааны засгийн газрын сайд Жан Батист Кольбер Чингис хааны түүх намтарыг бичих санааг анх гаргаж Пети де Круад энэ ажлыг даалгасан түүхтэй ажээ. Пети де Круа арав гаруй жилийн турш Чингис хаантай холбоотой бүхий л ном зохиолыг уншиж судалсны зэрэгцээ нижгээдийг нь франц хэл рүү хөрвүүлэх зэргээр ажилласаар 1695 онд нас эцэслэхээсээ өмнө “Эртний монголчуудын анхны эзэн хаан аугаа их Чингис хааны түүх” номоо бичиж дуусгасан байна. Монголыг түүхийг судлахад чухлаар анхааран үзүүштэй эх зохиолуудаас хятад сурвалжуудыг эс тооцвол үндсэндээ бүгд энд орсон байгаа нь уг ном шинжлэх ухааны ач холбогдол талаасаа ямар их үнэ цэнэтэй болохыг нотолно. Энэ номын доторх Чингис хааны угсаа гарвалаас эхлээд тэнгэрт халих хүртэлх олон үйл явдал нь Монголын нууц товчооны түүхийн мөчлөгүүдтэй давхцана. Монголын нууц товчоонд их хааны 1219-1255 онд Хорезмын хаант улс, Дундад Азид хийсэн аян дайны тухай товч бөгөөд ерөнхийд нь дурдах байдлаар бичигдсэн байдаг бол Пети де Круа энэ номондоо их хааны тэрхүү долоон жилийн байлдан дагууллын түүхийг маш дэлгэрэнгүй, үйл явдлыг өдөр хоногоор нь, нэр хаягтай тоочиж, нарийн дэс дараатай бичсэн байна.
