Товч агуулга:“Монголын нууц товчоо” нь түүх, утга зохиолын хосгүй дурсгал төдийгүй дунд үеийн монгол хэлний чухал баримт юм. Эрдэмтэн Ш.Гаадамба нь “Монголын нууц товчоо”-ны судлалаар олон жил ажиллаж уг дурсгалт бичгийн утга тодорхойгүй олон үг хэллэгийг Монгол аман зохиол, угсаатны зүй, зан үйл, эртний утга зохиолын жишээн дээр тулгуурлан тайлбарласан байдаг ба 1990 онд хэвлүүлсэн Монголын нууц товчоо: Худам (язгуур эртний) монгол бичгээр монгол бичиг, утга судлалын үүднээс төсөөлөн нягталж сэргээсэн эх, тайлбар хэмээх бүтээлээс үг, хэллэгийн тайлбарт зориулсан хэсгийг нь тусгай толь бичиг болгон дахин хэвлэсэн байна. Зохиогч "Монголын нууц товчоо"-г ийнхүү худам монгол бичгээр төсөөлөн сэргээн 691 үг хэллэгт тайлбар хийхдээ уг зохиолд тохиолдох дарааллаар нь дэсэлснийг монгол кирил бичгийн дараалалд оруулж, хуучин дэс дарааллын цэсийг толины төгсгөлд хавсаргажээ.
