Товч агуулга:Монгол улсын шинжлэх ухаанд XX зууны дунд үеэс Өрнийн арга зүй, технологийн дэвшлийг эзэмшин Дорнын уламжлалт соёлоо шинээр нээн судлаж, ард түмнээ дэлхийн хөгжилд түүчээлсэн эрдэмтэн сэхээтний нэгэн үе түүхийн захиалгаар төрөн гарсан билээ. Хорлоогийн Сампилдэндэв бол энэ үеийнхний нэгэн тод томруун төлөөлөгч юм. Энэ номд Монгол Улсын Соёлын гавьяат зүтгэлтэн, академич Хорлоогийн Сампилдэндэвийн анд нөхөд, эрдэмтэн судлаачид, шавь нар болон гэр бүлийн дурсамжийг эмхэтгэн нийтлүүлжээ. Дурсамжид нэрт эрдэмтнийг хувь хүний талаас болон түүний туурвил бүтээл, ном зохиол, удирдах авьяас зэрэг олон талаас нь үнэлж цэгнэн өгүүлсэн байна.
