Товч агуулга:Уг цуврал нь удиртгал хэсгээс гадна хэл зүгшрүүлэх хэллэг, тоглоом наадгайн үг гэсэн хоёр томоохон бүлгээс бүрдэнэ. Хэл зүгшрүүлэх хэллэгт түргэн хэллэг, жороо үг, амьсгал уртасгах үг багтсан бол тоглоом наадгайн үгэнд дайралцаа, оньсогонд гартсан хүнийг худалдах үг, дэмбээ, чоно тарвагацах зэрэг олон зүйлийн үгэн тоглоомыг оруулсан. Судалгааны буюу удиртгал хэсэгт хэл зүгшрүүлэх хэллэг, тоглоом наадгайн үг гэж юу болох болон тэдгээрийн ач холбогдол, онцлог шинж, өвөрмөц дүрслэл зэргийг тодруулан гаргасан төдийгүй,зарим улс орны хэл зүгшрүүлэх хэллэг, тоглоом наадгайн үгийн талаар оруулж өгсөн нь уншигч олонд цогц мэдлэгийг олгоно. Энэхүү ботид 400 гаруй түргэн хэллэг, 60 гаруй тоглоом наадгайн үгийг хувилбарын хамтаар оруулсан. Аман наадгайн түүвэрт гарч буй нутгийн аялгууны болон хуучны, хэрэглээ нь багассан үг хэллэгийн тайлбарыг хавсаргасан тул утга агуулгыг ойлгож мэдэхэд илүү дөхөмтэй. Хэсэг бүлэг хүмүүст бус монгол аман наадгай, үгэн тоглоомын талаар ойлголт, мэдлэгтэй болох гэсэн хүүхэд багачууд, оюутан залуус, эрдэмтэн багш гээд ер хэн бүхэнд зориулсан болно.