Товч агуулга:Дундад зууны үеийн Хятадын нэрт сурвалж бичиг болох, Манж Чин улсын үеийн Шүнь Жигийн 2-р онд /1645/ зохиогдсон “Мин улсын түүх”-ээс Монголын түүхэнд холбогдох “Татарын шастир”, “Ойрадын шастир”, “Урианхайн гурван харуул” хэмээх хэсгийг монгол хэлнээ хөрвүүлэн толилуулж байна. Татарын болон Ойрадын шастир нь Юань гүрэн мөхөж Юань гүрний сүүлчийн эзэн хаан Тогоонтөмөр Хятадаас хөөгдөн эх нутагтаа буцаж ирснээс эхлэн Монголын сүүлчийн эзэн хаан Лигдэний төр барьж байсан шувтарга үеийг хамарсан Монголын улс төрийн түүх, Монгол-Хятадын XIY-XYII зууны үеийн харилцааны түүхийн талаар өгүүлэх ажээ. “Урианхайн гурван харуул” нь манай монгол сурвалжид “Үжээд улс”, “Үлэг түмэн” хэмээн тэмдэглэгдсэн урианхай нарын тухай бөгөөд Монголын хаад ноёд урианхай гурван харуулуудыг өөртөө татаж, ураг барилдан, өөрийн эрхшээлд оруулж байсан тухай өгүүлжээ.
